Алтынньы ый 23 күнүгэр бэрт сэргэх биэчэри Өксөкүлээх Өлөксөй аатынан норуоттар доҕордоһууларын дьиэтигэр Матрена Ядрихинская, Любовь Шишигина тэрийэн ыыттылар.

Хотой Айыы домун Лукина Ирина Егоровна – Уйусхаана кэлбит дьоҥҥо толоттордо. Айыы холумтанын, туттар тэрилин туһунан билиһиннэрдэ. Айыы холумтана сэттэ ытык маллаах: Сандалы, сэргэ,чороон, көмүлүөк, чуораан, дэйбиир, туймуу. Айыы холумтана саха ыалын ытык миэстэтэ. Уйусхаана Айыы холумтанын үөрэҕин хас биирдии киһи билиэхтээҕин, күүскэ тарҕатары сүбэлээтэ. Бэйэтэ 300 тахса туому оҥорорун иһитиннэрдэ.

Алтынньы ый түмсүүлээх, тэрээһиннээх олох тускута олохтонор. Онон куту-сүрү күүһүрдэбит, түмсүүнү, тэрээһини төрүттээн олоххо сыһыарабыт. Хотой Айыы тойуга, ырыата, оһуохайа дуорайда.

Вера Владимировна уонна Рустам Леонидович Федоровтар Намтан кэлэн сахалыы, бэйэлэрэ илиилэринэн тутан-хабан оҥорбут оонньууларын көрдөрдүлэр. Айылҕа көстүүлэринэн айыллыбыт оонньуу саха киһитигэр чугас буолара мэлдьэҕэ суох.

Ольга Петровна Тарасова бэйэтэ оҕуруонан оҥорбут саха дьахтарын киэргэлин билиһиннэрдэ. Көрсүһүү оһуохайынан түмүктэннэ.